Alcoa propón un despedimento colectivo en aluminio con ata 534 obreiros afectados de 633

A multinacional plantexa aos sindicatos operar só unha parte da fundición, sen recortes en alúmina; insiste en que abre "un período de consultas informal" sen "ningunha decisión tomada"

Planta de Alcoa en San Cibrao. EFE/ ELISEO TRIGO

Alcoa emitiu este xoves un comunicado de prensa tralas reunións mantidas co comité de empresa de San Cibrao e coa representación dos traballadores a nivel europeo no que anuncia a súa intención de “iniciar un período de consultas para un proceso de despedimento colectivo. Este proceso afectaría potencialmente ata a un máximo de 534 empregados da planta de aluminio“, indicou a multinacional.

O complexo industrial de Cervo está composto por unha planta de aluminio e unha planta de alúmina, que empregan a 633 e 510 persoas respectivamente, segundo os datos da propia compañía. “A reestructuración prevista na planta de aluminio prevé operar só unha parte da fundición. A produción da planta de alúmina non se verá afectada por este período informal de consultas”, indica Alcoa.

A multinacional asegura que a situación de aluminio é “insostible” debido a “factores estruturais inherentes e a dificultades de carácter permanente”.

Esta fábrica “afronta unha serie de problemas externos de produción e de mercado que fixeron que a produción de aluminio primario sexa ineficiente e a operación da planta non sexa competitiva. Eses problemas estruturais inclúen os altos custos de enerxía e o baixo prezo do aluminio que, xunto co exceso de capacidade global, causaron significativas perdas recurrentes, que se prevé que continúen“, argumenta a multinacional, que remarca que “estes factores existían antes da crise da Covid-19 e espérase que continúen trala emerxencia sanitaria”.

ASEGURA QUE NON TOMARÁ “NINGUNHA DECISIÓN” ATA CONCLUÍR UNHAS CONVERSAS DE “TRES SEMANAS”

“Alcoa é consciente do posible impacto nos empregados e propuxo abrir un período informal de consultas coa representación dos traballadores, que terá unha duración aproximada de tres semanas, para explicar a situación da planta, os retos que afronta e discutir as opcións e medidas. O propósito desta consulta informal é poder avanzar cos representantes dos traballadores antes de iniciar un período formal de consultas, que ten uns prazos concretos”, explicou a empresa na nota, asegurando que “non se tomará ningunha decisión ata que o periodo de consultas conclúa“.

1 COMMENT

RESPOSTAR

Please enter your comment!
Please enter your name here