A Xunta e o Goberno central retomarán no mes de setembro os contactos para relanzar a candidatura da Ribeira Sacra a Patrimonio da Humanidade despois do paso atrás dado hai unhas semanas despois dun informe negativo elaborado polo Icomos, órgano asesor da Unesco.
Así o avanzou o conselleiro de Educación, Cultura e Universidades, Román Rodríguez, en resposta a unha pregunta oral formulada pola deputada do PSdeG Noa Díaz sobre a retirada da candidatura, acordada pola Administración autonómica e a central.
“O Goberno galego segue crendo no potencial da Ribeira Sacra e por iso continuaremos abordando este desafío ata conseguir o si definitivo”, incidiu Rodríguez, que apelou á unidade de forzas políticas, institucións e sociedade civil para lograr o obxectivo de que a Ribeira Sacra sexa nomeada Patrimonio Mundial.
Na súa quenda, a parlamentaria socialista cargara contra a xestión da Administración galega da candidatura que, segundo Díaz, centrou a súa “estratexia” na “espiritualidade” da zona, algo que foi posto en cuestión polos técnicos do Icomos.