Nova mobilización dos hostaleiros de Viveiro contra as restricións da Xunta de Galicia impostas a raíz do aumento da incidencia sobre o concello mariñán. A asociación que congrega ao sector viveirense vén de convocar unha mobilización para última hora da tarde deste martes en defensa do sector e contra a “estigmatización” que, segundo apuntan, están a sufrir da man dos xestores da pandemia.
A convocatoria está marcada para as 20:00 horas deste martes e partirá da Praza Maior do Concello para logo rematar ante o edificio da Consellería de Pesca. A mobilización chega despois de que Viveiro ascendera ao nivel alto de restricións marcado pola Xunta, de xeito que as consumicións quedan restrinxidas ás terrazas, que funcionarán a só un 50% do seu aforamento.
Os hostaleiros enfrontan esta “estigmatización” da que culpan á Xunta pedindo, precisamente, ao ente autonómico que “cambie a súa forma de actuar” para evitar ese “sinalamento” do que, consideran, están a ser vítimas; xa que, segundo subliñan, o cumprimento das normas contra a covid é rigoroso dentro do sector.