O delegado do Goberno en Galicia, José Miñones, supervisou esta mañá a finalización da obra do novo Centro de Atención e Información da Seguridade Social (CAISS) de Viveiro.
O goberno municipal agradeceupublicamente ao goberno estatal por sacar adiante este gran proxecto, “a construción dun novo edificio do CAISS, máis amplo e céntrico que o anterior, que sirva para cubrir as necesidades existentes”. “Trátase dun proxecto que moito tempo atascado e para o que, no seu momento, o concello cedera os terreos necesarios para a súa construción”, indicou nun comunicado.
Así, salienta que sta edificación, que contribúe a humanizar unha zona na que xa se concentran outros servizos públicos, como a Policía Nacional ou Correos, non prestará servizo só aos veciños de Viveiro, senón tamén aos municipios limítrofes, tratándose, polo tanto, dun servizo moi necesario.
Miñones estivo acompañado pola alcaldesa de Viveiro, María Loureiro; a subdelegada do Goberno en Lugo, Isabel Rodríguez, e o director provincial do INSS, Juan Rodríguez Gude. Tamén asistiron á visita outros membros do equipo de goberno e o voceiro do Grupo Municipal do Partido Popular, Óscar Rodríguez Blanco; o voceiro do Grupo Municipal de Por Viveiro, Bernardo Fraga Galdo; a voceira do Bloque Nacionalista Galego, Miriam Bermúdez García, e o concelleiro non adscrito, Luis Manuel García Otero.
O delegado do Goberno en Galicia aproveitou a visita para manter unha reunión de traballo co goberno municipal sobre temas pendentes.