InicioOccidentalViveiroA alcaldesa de Viveiro acusa ao delegado da Xunta de "falta de...

A alcaldesa de Viveiro acusa ao delegado da Xunta de “falta de respecto institucional”

A Alcaldesa de Viveiro, María Loureiro García fíxolle constar por carta ao delegado da Xunta, Javier Arias Fouz, que na reunión coa veciñanza de Celeiro debera estar convocado tamén o Concello.

Publicada o

- Advertisement -

A Alcaldesa de Viveiro, María Loureiro García, enviou unha carta ao delegado territorial da Xunta de Galicia en Lugo, Javier Arias Fouz, considerando “unha falta de respecto institucional” que o Concello de Viveiro non fose convocado á reunión informativa que tivo lugar o pasado xoves en Celeiro.

Tras a súa visita a Viveiro o pasado xoves 18 de novembro, a alcaldesa remitiulle o escrito para indicar que “nos parece ben a reunión informativa que mantivo cos veciños e veciñas de Celeiro en relación coas obras de saneamento da ría”, facendo constar, sen embargo, “que entendemos que o concello tamén debería formar parte desa reunión informativa”.

O Concello de Viveiro traballou e participou na tramitación necesaria para a execución destas obras, financiadas pola Xunta de Galicia a través de fondos europeos, colaborando e achegando toda a documentación requerida sempre á maior celeridade posible, tal e como pode comprobarse nos propios expedientes.

“Consideramos que se trata dunha cuestión de respecto institucional e entendemos que nunha visita ao noso concello, aínda que teña lugar en dependencias da Consellería do Mar, á que son citados os veciños e á que acude o voceiro do Grupo Municipal do Partido Popular, o resto dos grupos do Concello de Viveiro tamén deberían ter sido convocados”, engade Loureiro.

O Concello de Viveiro considera unha gran nova que se vaia a proceder á licitación destas obras, unhas actuacións imprescindibles e moi necesarias para a nosa ría, polas que agarda dende 2016, cando o Concello de Viveiro firmou o convenio coa Xunta de Galicia.

“Tamén entendemos e parécenos ben que se informe á plataforma veciñal, tendo en conta que os veciños e veciñas tamén axudaron ao concello a reivindicar o saneamento da ría de Viveiro, pero o que botamos en falta é que non se avisara ao concello”, recolle a carta.

“Insistindo en que que o anuncio da licitación destas obras é unha boa noticia, lamentamos que nin esta alcaldía nin os voceiros dos demais grupos políticos municipais, como representantes de todos os veciños e veciñas de Viveiro, fósemos convocados a esa reunión informativa na que si estivo presente o voceiro do Partido Popular”, remata a alcaldesa.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...