O BNG de Viveiro levou a pleno a proposta de reapertura e habilitación de aseos públicos na vila. O grupo municipal nacionalista criticou nunha nota de prensa a postura do PSOE viveirense de votar en contra.
En dita nota de prensa a concelleira do BNG, Miriam Bermúdez, sinala que durante o pleno celebrado onde se presentou a iniciativa, a alcaldesa de Viveiro, María Loureiro, “indicou que implicaría mantemento e limpeza, tachando de tarefa imposible co persoal do que dispón o Concello”.
Seguidamente, o BNG apuntou que a alcaldía anunciou o inicio de trámites “para que as instalacións do templete pasen a ser titularidade municipal” mais “a alcaldesa non quixo aclarar as datas deste trámite”. O BNG lembrou que hai un ano presentara unha moción para a reapertura da edificación.
Durante o pleno tamén se anunciou o comezo dos trámites de cooperación coa Comunidade de Montes de San Roque para que os aseos situados neste lugar permanezan abertos. O BNG di que estará atento para que “estas xestións sexan máis áxiles que as do Templete”.