Os servizos de emerxencias tiveron que excarcerar este domingo a un home que se saíu da estrada co coche e caeu por un desnivel na Pontenova.

O sinistro ocorreu ao redor das 17,30 no lugar de Dodrín. Sobre esa hora, un familiar do home accidentado chamou á central do 112 Galicia para solicitar axuda.

No seu relato, informa o 112, a persoa alertante explicaba que o home o chamou para indicar que sufrira un accidente e que necesitaba axuda para abandonar o vehículo. Nese momento, outro particular contactaba co 112 para contar que fora testemuña dunha saída de vía, concretamente en Dodrín.

Con estes datos, a central de emerxencias puxo en marcha un operativo que contou coa intervención do 061-Urxencias Sanitarias, dos bombeiros de Barreiros e dos membros do GES da Pontenova.

Os equipos de intervención tiveron que usar material de excarceración para liberar o ferido, tras o cal puido recibir asistencia médica por parte dos profesionais sanitarios.