O obreiro ferido na mañá deste venres en Rececende (A Pontenova) tras caerlle unha árbore enriba mentres traballaba nunha finca morreu de camiño ao Hospital Clínico Universitario Lucus Augusti (HULA).

O traballador, A. S. D., veciño da Terra Cha de 46 anos, era trasladado en ambulancia medicalizada cara o centro médico cando faleceu polas feridas causadas pola árbore.

O empregado estaba a traballar nunha parcela dun monte de Rececende cando o alcanzou un eucalipto. O suceso aconteceu sobre as dez da mañá e o 112 Galicia recibiu aviso ás 10.15 horas.

Os xestores do 112 solicitaron a colaboración dos axentes da Garda Civil e dos membros do GES pontenovés, ademais de Protección Civil da localidade.

Tamén se desprazou, segundo o 112, o helicóptero medicalizado con base en Santiago de Compostela.

TRES SINISTROS MORTAIS NUN MES

Co sucedido este mércores, o concello da Pontenova padeceu tres accidentes mortais ao longo do último mes.

O pasado 1 de novembro, un ancián de 76 anos faleceu en Aldeguer, na parroquia de San Xulián de Vilaboa, tras envorcar o tractor que manexaba.

O 22 de outubro, un traballador de Taramundi pereceu nun accidente de tráfico cando envorcou a formigoneira que conducía en Vilar de Pedras, na mesma parroquia de Rececende.