O Concello de Barreiros colocou uns pictogramas en varias dependencias municipais -o ximnasio ou o centro social- para facilitar o acceso a persoas con diversidade funcional. Trátase de apoios visuais que se instalaron en colaboración coa Fundación Edes.
O alcalde de Barreiros, Alfonso Fuente Parga, explicou que “estes pictogramas lembran como debemos ducharnos, lavar as mans ou vestirnos. Algo que nos parece a todo o mundo tan sinxelo, para algunhas persoas ten moita dificultade e estes pictogramas poden axudarlles moito. A todo o mundo nos vén ben recordas estas normas”, resaltou.
Con estes apoios visuais preténdese dar un paso cara á accesibilidade cognitiva e a igualdade de oportunidades das persoas. Tamén favorece a comprensión dos entornos á poboación en xeral xa que as claves visuais facilitan e reforzan as mensaxes a todas as persoas.
FUNDACIÓN EDES
A Fundación Edes, fundada no 1999, é unha entidade integrada por persoas con discapacidade psíquica e intelectual, familias, profesionais e voluntarios que se unen para contribuír a que os discapacitados melloren a súa calidade de vida. O colectivo centra o seu traballo na Mariña Lucense e no noroccidente asturiano.
