A alcaldesa de Barreiros, a nacionalista Ana Ermida, urxe ao Servizo Galego de Saúde a que repoña o persoal médico e de pediatría no centro de saúde deste municipio da Mariña. Hermida manifestou este venres que por parte do Concello dirixíronse ” ao Sergas” porque levan “un tempo no centro de saúde de Barreiros onde a persoa que prestaba atención pediátrica fixo un cambio de destino e a cobertura faise en momentos puntuais”.
“Non hai estabilidade e evidentemente nesta época é bastante habitual que os nenos e nenas teñan que recibir ese tipo de atención“, lamentou a rexedora.
Ademais, Hermida tamén se queixou de que “o persoal médico está minguado por cuestións de permisos ou vacacións, e non se cobren as prazas” de especialistas facultativos. “Durante varios días a atención do centro de saúde foi realizada por unha única persoa co que iso leva, nun concello cunha poboación envellecida que temos e tan só un atende as citas de tres médicos”, lamentou.
A alcaldesa de Barreiros puntualizou que, igualmente, “nos últimos días houbo cancelacións de citas non urxentes e é que non pode ser que unha persoa faga o traballo de tres porque a calidade do servizo vese minorada”. “Queremos que se cubran eses descansos. O Sergas ten que ter previsión para cubrir con normalidade o servizo porque se está producindo unha deterioración da sanidade pública”, censurou Ana Hermida.
Son sobre 3.000 os veciños de Barreiros, comentou, co “inconveniente e agravante” de que aumenta a poboación “nestas datas” de persoas que se achegan ata este municipio onde teñen situada a súa segunda residencia, para pasar as festas do Nadal.