O Ribadeo FC e maila Acisa presentaron este xoves o viño oficial do club de fútbol ribadense. A entidade deportiva e o colectivo de comerciantes poñerán á venda 3.000 botellas de albariño e rioxa colleiteiros e vermú.

Trátase dun xeito novidoso de apoiar ao equipo do Pepe Barrera, que levará 50 céntimos por cada botella vendida. O produto ofrecerase en caixas de seis e o pack de tres envases -con seis unidades de cada unha das tres bebidas- custará 60 euros.

A hostalería tamén ofrecerá os viños e o vermú do Ribadeo FC. Os negocios poderán adquirir a tres euros a botella do albariño colleiteiro, 2,5 euros o rioja colleiteiro e a 4,5 o vermú, todos con IVE incluído.

O xerente de Discosta Norte, José Antonio Veiga, sinalou na presentación que “é a primeira vez que a nosa bodega envasa vermú” e subliñou que “colaborar co deporte do pobo é un compromiso que temos en San Damián“.

“Imos poñer as bebidas á venta nos máximos locais posibles e tamén facer caixas bonitas, deseñadas por Carlos, que valen como regalo”, precisou Veiga.

Na presentación estiveron José Antonio Veiga, xerente de Discosta Norte; Ana Vázquez, presidenta do club ribadense; Jesús Pérez, xerente de Acisa, e Ramón Loredo, membro da directiva do colectivo empresarial ribadense.

A presidenta do Ribadeo FC, Ana Vázquez, indicou que “pretendemos innovar un pouco, intentar sacar algo diferente, saírnos do que é habitual para sacar fondos como rifas e demais”.

Pola súa banda, o xerente de Acisa, Jesús Pérez, asegurou que o colectivo de comerciantes púxose a disposición de Ribadeo FC e San Damián “para vender o viño na hostalería asociada, o que será un incentivo máis para axudar ao club”. Tamén participou na presentación Ramón Loredo, membro da asociación de empresarios ribadense.