Denuncian que o centro de saúde de Ribadeo leva dúas semanas sen pediatra

O PSOE alerta de que hai pais que están a acudir "a clínicas privadas" e esixe ao Sergas que "cubra inmediatamente e a tempo completo" a baixa do profesional

O PSOE de Ribadeo denuncia que o centro de saúde leva dúas semanas sen pediatra trala ausencia do especialista, de baixa por enfermidade.

Os socialistas explican que o Servizo Galego de Saúde (Sergas) envía substitutos “un ou dous días á semana”, algún dos cales “non ten a especialidade de pediatría”.

O PSOE ribadense critica así que se están a producir listaxes de agarda “moi altas”, porque “o facultativo que está non pode cubrir en un ou dous días a carga de traballo que facía o médico que está de baixa en cinco”.

1.300 TARXETAS SANITARIAS

O centro de saúde ribadense dá servizo a 1.300 crianzas, segundo indican os socialistas, que lamentan que “cando se dan urxencias, os pais téñenas que levar a especialistas privados e pagar ditas consultas”.

A candidata do PSOE á alcaldía de Ribadeo, Marta Rey, censura que “os recortes por parte da Xunta do PP están a deteriorar a nosa sanidade e os veciños non reciben o servizo que se merecen”. Por iso, esixe ao Sergas que “cubra inmediatamente a praza de pediatría”.

CASO SIMILAR EN XOVE

A situación do centro de saúde ribadense é similar á de Xove, denunciada polo BNG local e contra a que protestaron 150 veciños. No ambulatorio xovense a profesional estará de vacacións ata o 20 de marzo sen que o Sergas cubra a tempo completo á especialista. 

RESPOSTAR

Please enter your comment!
Please enter your name here