O Concello de Ribadeo pon en marcha a terceira edición da Pancha, a moeda local ribadense para a que se invirten 150.000 euros de fondos propios. Con esta moeda pretenden beneficiar e impulsar o comercio local, e esperan un retorno mínimo de 600.000 euros para os negocios de Ribadeo.

O concelleiro de Desenvolvemento Local de Ribadeo, Pablo Vizoso, destacou que nesta edición a moeda será totalmente dixital, unha nova versión que facilitará os pagos, que se farán de forma automática mediante códigos QR. Ademais, non será necesario acudir á entidade bancaria de Ribadeo, polo que “estenderá os seus efectos máis alá do límite de Ribadeo”, como indicou Vizoso.

A través do Panchapeto, os veciños poderán realizar as súas compras cun dispositivo móbil e os propietarios dos establecementos non terán que validar os tíckets de venta no concello. Con esta iniciativa pretenden beneficiar a todo o sector de comerciantes, en especial á hostalaría: “O Panchapeto non condiciona ao comprador a realizar unha compra mínima, senón que vai poder pagar a súa consumición por mínima que sexa do seu Panchapeto”.

Con respecto a outras edicións, mantéñense as características principais da pancha, Cada persoa maior de idade poderá comprar un máximo de 7 packs de 30 euros. Por cada pack recíbense 40 panchas cun valor nominal de 40 euros, e en cada establecemento non se poderán gastar máis de 80 panchas por compra.