O Concello de Ribadeo asinou, un ano máis, un convenio coa asociación Educando en Familia que presta axuda e asesoramento a 40 familias ribadenses con nenos e nenas de 0 a 6 anos. O importe ascende a 4.000 euros.
O alcalde, Fernando Suárez, sinalou que “seguimos apoiando desde a Área de Educación, que leva a miña compañeira Mariluz Álvarez Lastra, coa sinatura deste convenio anual con esta asociación que se chama Educando en familia”. A través deste convenio que conta cun importe de 4.000 euros, estase dando apoio e asesoramento a unhas corenta familias con nenos entre 0 e 6 de anos de Ribadeo, con especial atención en familias que baixo o risco de exclusión ou mesmo con aquelas que son monoparentais.
O rexedor subliñou que “con este convenio estamos promovendo que un equipo educativo moi profesional, composto por docentes especializadas e con moita experiencia, poidan dar unha serie de consellos, de asesoramento ás familias de como educar aos nenos e nenas”.
Suárez Barcia lembrou que “hai que apoiar este tipo de iniciativas sobre todo cando a administración educativa, autonómica neste caso, non se fai cargo e os Concellos, aínda que non sexa unha competencia directa nosa, temos que seguir apoiando estas iniciativas tan interesantes”.