IniciosociedadePP e BNG de Burela piden aprazar o contrato de recollida do...

PP e BNG de Burela piden aprazar o contrato de recollida do lixo ata despois das eleccións

Os populares anuncian unha emenda de substitución á moción do goberno no pleno do mércores, e os nacionalistas instan a explorar vías para municipalizar o servizo

Publicada o

- Advertisement -

O PP e mailo BNG de Burela pedirán o aprazamento, ata despois das eleccións municipais de maio, da aprobación do novo contrato de xestión de residuos, limpeza viaria e de praias e xestión do punto limpo, que o goberno municipal levará a pleno o vindeiro mércores.

Os populares anunciaron que presentarán unha emenda de substitución para que o executivo municipal paralice o expediente de contratación dos servizos.

“HIPOTECA” PARA O CONCELLO

Os conservadores consideran que o contrato, de catro anos cun de prórroga e un custo anual superior aos 800.000 euros, suporá “hipotecar as dúas próximas corporacións municipais”.

O grupo municipal do PP cifra o aumento do gasto neste eido en “184.000 euros por ano” e argumenta que “a adxudicación do mesmo é practicamente imposible antes dos vindeiros comicios, debido aos diferentes trámites que hai que levar a cabo”.

OS POPULARES CALCULAN QUE O GASTO NESTE EIDO AUMENTARÁ “184.000 EUROS AO ANO”

O Partido Popular burelao expuxo ao longo dos últimos meses que o incremento do gasto “non se traducirá dunha mellora no servizo”. Así, os conservadores critican “a obsesión” do executivo municipal por sacar adiante este contrato, o que consideran “de dubidosa equidade, ética e transparencia”.

“MANCOMUNAR” O SERVIZO

Pola súa banda, os nacionalistas instan ao goberno local a aprazar a aprobación do contrato ata despois do 26 de maio para abordar unha posible recuperación da xestión do servizo.

Malia que recoñece que a municipalización da recollida de lixo topa con “informes de custos e viabilidade dos que non dubidamos”, o BNG burelao afirma que existen outras vías para acadar este propósito que, lembra, “tanto o noso partido como o PSOE levabamos no programa electoral”.

OS NACIONALISTAS PIDEN RETOMAR NA VINDEIRA LEXISLATURA “A RECUPERACIÓN DA XESTIÓN” DOS RESIDUOS

Así, o voceiro dos nacionalistas, Mario Pillado, lamenta que “en catro anos nin se plantexou a posibilidade de mancomunar a recollida de lixo, ou de valorar que sexa a Mancomunidade de Municipios da Mariña quen preste o servizo para os 16 concellos da bisbarra”.

Deste xeito, Pillado solicita “que o equipo de goberno futuro” teña marxe para “traballar con honestidade e seriedade, e valorar todas as opcións”.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...