InicioPolíticaSuso Fernández será o número 2 da candidatura do PSOE en Viveiro

Suso Fernández será o número 2 da candidatura do PSOE en Viveiro

Lara Fernández-Noriega sube ao terceiro posto e Cal cae ao cuarto; César Iglesias Docal e Victoria Baamonde Gómez serán as primeiras caras novas, nas prazas sexta e sétima da listaxe

Publicada o

- Advertisement -

O PSdeG-PSOE de Viveiro presentou aos seus afiliados e simpatizantes a candidatura coa que concorrerá ás vindeiras eleccións municipais, unha listaxe que liderará a alcaldesa, María Loureiro, e na que as principais novidades son a suba de Suso Fernández ao posto 2 e de Lara Fernández-Noriega á posición número 3, mentres que Jesús Fernández Cal, segundo da listaxe en 2015, irá en cuarto lugar.

Nos pasados comicios, o terceiro posto fora para Isabel Rodríguez, actual subdelegada do Goberno central en Lugo.

Tanto Suso Fernández como Lara Fernández-Noriega foron concelleiros na lexislatura que vén de rematar. O primeiro deles, que engrosou a listaxe socialista en 2015 despois da desaparición do partido Independentes de Viveiro (IVI), foi segundo tenente de alcalde e asumiu as áreas de economía e facenda, mar e participación cidadá. Pola súa banda, a segunda ocupouse dos departamentos de muller e xuventude.

A quinta posición será para outra edil do goberno local de 2015-2019, Marisol Rey, que se encargou de turismo e comercio.

CONTINUIDADE

Loureiro destaca que a continuidade nos primeiros postos demostra “a boa sintonía que tivo o goberno local de Viveiro” e subliña que está “moi orgullosa do traballo de todos, polo que queremos seguir na mesma liña”.

Respecto ao número 2 da candidatura, remarca que é unha persona “moi colaboradora e traballadora, que veu doutro partido e que sumou desde o principio e demostrou ser perfectamente compatible co proxecto do PSdeG-PSOE”.

No tocante á número 3, subliña que “Viveiro tivo ao longo desta lexislatura unha oferta cultural variada e cunha aposta forte polas actividades gratuítas“. De Cal, tenente de alcalde e concelleiro de obras, destacou a súa “sabedoría, implicación e cercanía á veciñanza. Foi un edil adicado as 24 horas do día”, subliñou.

Respecto a Rey, cre que “fixo un gran traballo para atraer turismo ao municipio, que se seguirá vendo ao longo dos anos“.

CARAS NOVAS NO 6 E NO 7

Ata o quinto posto, a listaxe dos socialistas mostra unha querencia pola continuidade. As primeiras grandes novidades están na sexta praza, con César Iglesias Docal, e con Victoria Baamonde Gómez.

No primeiro dos casos, “é unha persoa que coñezo desde hai moito tempo e que estou segura de que nos vai achegar criterio e ganas de traballar”, explicou Loureiro. Respecto á número 7 da listaxe, a candidata do PSdeG-PSOE expón que “é unha psicóloga de 26 anos, que leva xa meses a traballar con nós e que pola súa formación e pola súa xuventude vainos dar un punto de vista diferente. Hai que escoitar aos novos”, conclúe a alcaldable dos socialistas.

Os postos 8 e 9 son para outros dous edís, Emilio Villarmeá (deportes) e Mari Carmen Franco (educación e servizos sociais). O posto 10 é para o sindicalista de Comisións Obreiras (CC OO) Jacobo Bermúdez, que entrou na corporación trala marcha de Rodríguez.

CARMEN VARELA, OUTRA NOVIDADE

O número 11 será para Carmen Varela Vázquez, unha das persoas da organización da Festa Labrega de Landrove e traballadora da residencia que ten a Asociación de Axuda ao Enfermo Mental da Mariña en Cervo.

Iber Xosé Sánchez Rey; Dulce María Cociña Neira; Óscar Canoura González; Victorina Raposo de Matos; Jesús Chao da Silva e María Dolores Fraga Fernández completan a listaxe dos socialistas. Vicente Hermida Rodríguez, Telma Canoura Regal e Aurelio Goás Gómez serán os suplentes.

O 3 DE MAIO, PRESENTACIÓN

Loureiro conclúe que se trata dunha lista “paritaria” que “garda a esencia do Partido Socialista” e que representará “a todos os sectores da sociedade viveirense. Levamos xente da industria, da pesca, das asociacións ou estudantes, como é o caso de Óscar Canoura, que ten 18 anos“, expón.

A presentación en sociedade da listaxe electoral do PSdeG-PSOE de Viveiro será o día 3 de maio, no Teatro Pastor Díaz.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...