O BNG de Mondoñedo presentou unha queixa ante a Valedora do Pobo en relación co funcionamento ordinario do Concello no que tocante ao acceso á información, coa entrega das actas das reunións da Xunta de Goberno Local e sobre a celebración periódica dos plenos ordinarios no Concello.
Segundo o voceiro do BNG mindoniense, Eloi Cabanas, o funcionamento ordinario do Concello de Mondoñedo é “totalmente contrario aos dereitos dos concelleiros”. O edil denuncia “obstrucións nas funcións de fiscalización e control encomendadas aos concelleiros da oposición por parte da lexislación local básica”.
A modo de exemplo, Cabanas apunta que desde o 1 de xullo deste ano non se entregan as actas das reunións da Xunta de Goberno Local, reuníndose esta todos os luns tal e como se estableceu no pleno de organización do Concello o pasado 24/06/2019.
“DIFICÚLTASE” A LABOR DE FISCALIZACIÓN DA OPOSICIÓN
“Con este feito o goberno popular de Elena Candia incumpre de forma flagrante a lexislación vixente a cal establece que despois da celebración da xunta de goberno hai un prazo de dez días para enviar copia da acta a todos os membros da corporación”.
Por outra banda o BNG tamén se queixa pola demora no tempo de entrega da documentación solicitada formalmente no rexistro, no acceso á información de expedientes que obran en poder do Concello para poder facer efectivas e reais as funcións de control e fiscalización da labor do goberno que ostentan os concelleiros da oposición.
Esta solicitude de información, “no mellor dos casos facilítase pasados meses desde a solicitude”, critica Cabanas, “o que ocasiona un grave prexuízo aos concelleiros da corporación. A última documentación que recibimos foi solicitada por escrito a mediados de agosto e o goberno ten que saber que se no prazo de cinco días non se dita resolución denegatoria debidamente xustificada, a petición de acceso a información entenderase concedida por silencio administrativo”, explica.
CRÍTICA AO “ABUSO” DOS PLENOS EXTRAORDINARIOS
Finalmente o edil nacionalista indica que tampouco se respecta a periodicidade de celebración dos plenos ordinarios establecidos igualmente na sesión plenaria de organización da nova corporación local, “último venres dos meses de xullo, setembro, novembro, xaneiro, marzo e maio, debendo así realizarse un pleno no mes de setembro que non foi convocado, mais no mes de outubro celebráronse tres plenos extraordinarios convocados por urxencia”, sinala.
Para o voceiro nacionalista as convocatorias non estaban axeitadamente xustificadas xa que o seu propio nome xa indica que debe ser unha circunstancia extraordinaria urxente a que permite convocar plenos con estas características. “Este tipo de sesións plenarias non permiten un estudo sosegado dos asuntos que conforman a orde do día e privan á oposición de debater as súas propias mocións e realizar rogos e preguntas de interese para a veciñanza”, expón Cabanas, que lle pide á alcaldesa “que cese na súa actitude de restrición dos seus dereitos e que cumpra os prazos conforme se establecen na lei”.