A alcaldesa de Viveiro, María Loureiro, solicitou á Xunta de Galicia a reanudación do Servizo de Mediación, Arbitraxe e Conciliación (SMAC). Grazas a un acordo entre a administración local e o SMAC de Lugo, o servizo viña prestándose un día á semana nesta localidade. Pero este quedou interrompido dende o inicio da pandemia.

Por iso, tendo en conta a situación actual e considerando que se trata dun servizo necesario para Viveiro, o concello remitiulle á Xunta un escrito. A Xefatura Territorial da Consellería de Emprego e Igualdade respostou indicando que se preve a súa reanudación “en canto as circunstancias actuais o fagan aconsellable”.

“Dende o concello estaremos pendentes para que a reanudación poida realizarse o antes posible, con todos os protocolos Covid-19 pero tendo en conta que falamos dun servizo moi necesario”, destacou a alcaldesa de Viveiro nun comunicado.