O capitán marítimo de Burela, Fernando Otero, asegurou que o patrón do ‘Virxe dos Milagros’, barco embarrancado tres millas ao sur de Burela, atópase en “shock”, aínda que “está ben”, tras este sinistro que tivo lugar na madrugada deste xoves.
Otero precisou que o barco, un cerqueiro, navegaba pola zona, en busca dalgún banco de peixe. “E non sabemos o que pasou, o barco colleu un rumbo de varada ata que varou“. “O barco quedou embarrancado nunha zona de pedras, sen danos, o mar estaba ben. Agora téntase reflotalo”, explica.
A tripulación, dez mariñeiros, foi rescatada por “as embarcacións que ían con ese barco en faenas de pesca, que traballan o mesmo arte e adoitan saír xuntas”. Os mariñeiros saíron da embarcación, mentres ao patrón e ao mecánico rescatounos un helicóptero.
Segundo explica Fernando Otero, o suceso produciuse nunha zona chamada Porto de Nois, no municipio de Foz, nun sitio que “non é areoso, é unha zona rochosa”. Así, deixou claro que “aínda é temperán” para coñecer as causas do embarrancamiento. “O mar era bo, a noite normal e por que embarrancaron non se sabe aínda”, indica.