O BNG de Foz denuncia a situación do centro de saúde. Os nacionalistas aseguran que o ambulatorio focego funciona “cun sobreesforzo eterno” dos seus profesionais.

O grupo municipal do BNG critica “as reiteradas e inadecuadas coberturas con medias xornadas das e dos Diplomados Universitarios de Enfermería (DUE) e a inexistencia da cobertura das baixas de sanitarios e de Personal de Servizos Xerais (PSX)”.

Os nacionalistas enumeran carencias e lembran “a non reposición da xubilación en 2018 dunha auxiliar de enfermería” e que “continúa sen cubrirse a reducción de xornada do Servizo de odontoloxía e o de pediatría“.

Ademais, o BNG local sinala que o centro de saúde “quedará sen servizo de odontoloxía e pediatría máis dunha semana”, o que consideran “grave” pola reiteración “das non coberturas de ausencias programadas destes e outros profesionais”.

O partido frontista insta á Xunta de Galicia a garantir “un funcionamento axeitado dos servizos públicos”.