Eduardo Fraga pregoará a 16 edición da Festa do Chícaro, o 19 e 20 de xaneiro

O ex secretario da confraría de pescadores de Foz abrirá a primeira exaltación gastronómica do ano en Galicia, a do berberecho

García Bermúdez, Castiñeira e Fernández Manín, na presentación. AXM

O ex secretario da confraría de pescadores de Foz, Eduardo Fraga, será o pregoeiro da décimo sexta edición da Festa do Chícaro (berberecho), que se celebrará os días 19 e 20 de xaneiro.

O programa de actividades da considerada primeira exaltación gastronómica do ano en Galicia comezará, con todo, o día 17, cunha charla sobre marisqueo e acuicultura de Galicia.

CHARLA

Participarán na conferencia Susana Novo Vázquez, Justa Ojeda Martínez e Bibiana Viñas, doutoras en bioloxía e investigadoras do Centro de Cultivos Mariños de Ribadeo, da Consellería do Mar. A cita será ás 11.00 horas, na casa da cultura de Foz.

PREGÓN

O sábado 19, os festexos comezarán na carpa do peirao ás 12.00 horas coa inauguración do evento e mailo pregón.

O pregoeiro, natural de Celeiro, traballou nas confrarías celeirense e do Vicedo antes de rematar a súa traxectoria profesional en Foz. Así, segundo explicou o concelleiro de mar, Pedro Fernández Manín, Eduardo Fraga “é un gran coñecedor dos problemas da zona e da ría, e unha persoa que pode adaptar o pregón a unha festa que coñece perfectamente”.

A partir das 12.40 horas haberá unha actuación a cargo do grupo Mar Aberto de Foz.

Programación. AXM

CATRO RECEITAS

Ao seu remate comezará a degustación do chícaro nas catro preparacións xa habituais.

Poderase probar en empanada, elaborada por Anduriña; e á provenzal, ao vapor e con fabas de Lourenzá, preparada pola Escola de Hostalería de Foz. Esta festa gastronómica tamén se desenvolverá en varios locais hostaleiros da vila o sábado e o domingo.

CINCO EUROS A RACIÓN

A ración custará cinco euros, coa bebida, tanto auga como cervexa e viño, a un euro. A música continuará durante todo o día e ata a noite, coa charanga NBA.

ACHEGAS

A asociación Sempre Foz é a encargada da organización en colaboración co Concello, que conta coas achegas da Xunta de Galicia e da Deputación Provincial de Lugo.

Participaron na presentación do evento o alcalde focego, Javier Jorge Castiñeira, Fernández Manín e a deputada provincial Mayra García Bermúdez.

RESPOSTAR

Please enter your comment!
Please enter your name here