O Ies Elisa y Luis Villamil de Vegadeo recibiu este luns na sede do Ministerio de Educación e Formación Profesional a praca de honra da Orde Civil Alfonso X o Sabio, xunto a outros cinco centros educativos, un deles o Ies Lucus Augusti lucense.
O Centro de Educación Infantil e Primaria de Laredo, en Redondela; o Colegio Menesiano de Santo Domingo de la Calzada na Rioxa; o colexio Madres Ursulinas de Sigüenza en Guadalaxara, e o Centro Público de Educación Básica Aurelio Menéndez de San Antolín de Ibias, en Asturias, recibiron tamén o galardón.
Segundo o Ministerio, coa concesión recoñécese a un grupo de centros educativos que destacan entre os que desenvolven diariamente unha tarefa vital para a mellora da educación en España. “As boas prácticas que desenvolvedes debemos extrapolalas ao resto de institutos e colexios do territorio nacional”, indicou a ministra, Isabel Celáa.
Os méritos obtidos nos campos da educación, a ciencia, a cultura, a docencia ou a investigación fundamentan este recoñecemento.
DINAMIZACIÓN DO ENSINO
No caso do IES Elisa y Luis Villamil, o Goberno subliña “o marcado carácter innovador” do proxecto socioeducativo Foro Comunicación y Escuela, que “contribuíu a dinamizar o ensino con importantes achegas no ámbito educativo”.
Pola súa banda, o CPEB Aurelio Menéndez de San Antolín de Ibias desenvolveu un “plan educativo pioneiro de escola aberta á comunidade no medio rural”. O Ies Lucus Augusti, pola súa banda, cumpriu 175 anos convertido “nun referente educativo” da cidade de Lugo.