O Concello de Mondoñedo e a Asociación de Comerciantes e Industriais (Aciam) presentaron o cartel do desfile de Entroido, que se celebrará o sábado 9 de marzo e durante o que se repartirán 5.000 euros en premios.

O desfile celebrarase a partir das 17.30 horas. Sairá do Campo dos Paxariños, encabezado pola carroza da raíña do Entroido, e percorrerá a Avenida San Lucas e as rúas Obispo Sarmiento, Andrés Baamonde e Progreso. Rematará na Praza da Catedral.

A alcaldesa, a popular Elena Candia, xunto ao edil de educación, mocidade e novas tecnoloxías, Alberto García; e ao presidente da Aciam, Ángel Marful, presentaron os festexos deste ano, nos que esperan “participantes chegados de diferentes puntos da comarca e mesmo de fóra da Mariña”, explican.

PREMIOS

A bases do Entroido mindoniense establecen a posibilidade de participar en función da idade, nas categorías infantil -para menores de doce anos– ou adultos. Tanto en adulto como infantil haberá concurso individual e por parellas. 

No apartado de grupos infantís, máis da metade dos seus compoñentes deben ser menores da idade establecida.

Os adultos poderán anotarse a nivel colectivo nas seguintes categorías: comparsas e charangas; grupos de tres a dez membros e de máis de dez membros.

A organización repartirá 5.000 euros entre 29 premios: seis deles na categoría de comparsas e charangas e once na de grupos tanto de adultos como infantís. Ademais, haberá outros seis galardóns para as parellas de adultos e infantís e outra media ducia en individuais.

VERBENA

A programación tamén inclúe, a partir das 20.00 horas, actuacións musicais na Praza do Concello da man de formacións mindonienses como son a orquestra Principal e o grupo Xuventude, dentro da “aposta clara do goberno local polos músicos locais”.

INSCRICIÓNS

A organización abriu o prazo de inscrición e os interesados poderán anotarse a través do correo electrónico entroidomindoniense@gmail.com ou no portelo do consistorio (primeiro andar). Informan no número de teléfono 619.879.499.