A alcaldesa de Viveiro, María Loureiro, esixiu “un arranxo integral” da estrada LU-161, que conecta a localidade viveirense de Landrove con Ferreira do Valadouro, tralo anuncio da Xunta de Galicia de que investirá “este ano” 443.000 euros en acondicionar a vía.
A rexedora considera que as medidas proxectadas polo Goberno galego “non chegan, son un parche e un lavado de imaxe de cara ás vindeiras eleccións municipais”. Loureiro afirma que é preciso “ensanchar as vías para facelas máis seguras, dotalas de beiravías, repintar a sinalización e limpar as cunetas”, para o que o Executivo autonómico “ten medios suficientes“, asegura.
EMENDA AOS ORZAMENTOS
A alcaldesa viveirense critica que o Goberno galego “rexeitara unha emenda presentada polos socialistas aos orzamentos de 2019, na que se recollía unha partida de 800.000 euros para a mellora da LU-161. Agora, dous meses despois, informan de que farán obras este ano”, lamenta.