Sargadelos retomará a partir do vindeiro luns, 1 de xullo, as visitas guiadas á súa planta de produción de Cervo.
Nos meses de xullo e agosto, as visitas guiadas á fábrica de cerámica cervense comezarán ás 11.00 e 13.00 horas, cunha duración estimada de entre 30 e 40 minutos.
Durante todo o ano, os interesados poden visitar as plantas de produción de Cervo e Sada e coñecer o proceso produtivo de forma libre e sen guía.
No verán, o grupo empresarial inclúe a posibilidade de desfrutar de visitas guiadas para “coñecer cada un dos procesos polos que pasa un produto de Sargadelos ata converterse nunha peza única de porcelana da máis alta calidade”, expón nun comunicado.
“Trátase dun proceso moi laborioso, case artesanal e de gran complexidade manufactureira que se mantivo vivo durante séculos e que constitúe un tesouro en si mesmo”, explica.
MÁIS DE DOUS SÉCULOS DE HISTORIA
Sargadelos destaca que poder ver in situ ás traballadoras realizar as pezas “causa grande interés no visitante, xa que o noso é un proceso que fuxe da industrialización para achegarse ao artesán, feito que pon en valor que cada unha das nosas pezas sexa única e representativa da nosa terra”.
A intención do programa é “fomentar e preservar un dos fitos do patrimonio cultural, histórico e empresarial de Galicia con máis de 210 anos de historia”.
VISITAS PARA GRUPOS
Ademais, durante todo o ano pódense organizar visitas guiadas para grupos chamando ao teléfono de contacto 982.55.78.41 ou a través do correo electrónico sargadelos@sargadelos.com.