O BNG de Mondoñedo acusa á alcaldesa Elena Candia de manter unha “actitude hipócrita” en relación cos problemas derivados do peche da A-8 como consecuencia da néboa.
O voceiro nacionalista Eloi Cabanas contrasta esta demanda coa “compracencia que amosou durante a etapa que o Partido Popular gobernou no Estado”.
“Se a N-634 non está en condicións óptimas de absorber tanto tráfico cando a néboa obriga a cortar a A-8 tamén o estaba despois da inauguración do tramo da autovía fai agora cinco anos e medio”, sinalou.
Cabanas critica que “están sen executar un proxecto de obras de mellora na estrada que”, segundo expón, “foron anunciados publicamente pola alcaldesa e outros representantes públicos do Partido Popular“.
“FALTA DE COMPROMISO DO ESTADO”
O nacionalista lamentou “a falta de compromiso dos diferentes gobernos do Estado cos problemas do peche da autovía”.
Así, explicou que “seguimos sen saber nada dos proxectos experimentais para evitar a néboa, con 6 millóns de euros orzamentados”.
Tamén criticou a ineficiencia “das balizas instaladas a modo de proba para melloras a seguridade no tráfico”.
TERCEIRO CARRIL
Con respecto á N-634, o BNG propón prolongar o terceiro carril da estrada ata a rotonda de enlace coa A-8, unha iniciativa aprobada de forma unánime polo pleno municipal na pasada lexislatura.
“Sería unha alternativa aos continuos peches da autovía, xa que moitos transportistas decidiron desistir xa de utilizar a autovía pola perigosidade do Fiouco e tamén polo menor consumo de combustible que supón o traxecto de 18 quilómetros pola N-634″, concluíu.
