O adestrador do Pescados Rubén Burela FS, o alfocego Juanma Marrube, será o pregoeiro da vixésimo primeira edición do Mercado Medieval de Alfoz, que organizará o Concello “para garantir a súa continuidade”. A cita celebrarase os días 19 e 20 de xullo na fortaleza de Pardo de Cela.
O deputado de turismo en funcións, Eduardo Vidal, o alcalde de Alfoz, Jorge Val, e a tenente de alcalde, Aránzazu Incera, presentaron este luns na Torre do Castelo de Castrodouro a vindeira edición do evento.
Val explicou que “este ano é o primeiro que organizamos directamente o mercado desde o Concello. Deste xeito garantimos a súa continuidade favorecendo así que cada ano chegue a máis xente”, afirmou. A Deputación é o principal patrocinador do evento.
A representación teatral do sábado, presentada polo escritor e actor Manuel Lourenzo, fillo predilecto do Valadouro, estará dirixida por Pedro López Murillo, xunto con un grupo de veciños voluntarios.
DANZAS MEDIEVAIS
Durante a xornada tamén haberá danzas medievais a cargo de Marco Uría, así como desfile de traxes medievais a cargo do Nabiño de Mondoñedo, que tamén contará cunha exposición de vestimentas de época no interior do castelo.
ACTIVIDADES PARA NENOS
Ademais, o programa ofrece actividades para os máis pequenos, como paseos a cabalo, obradoiros de cestería e panadería, ou xogos tradicionais e monicreques.
DE VOLTA A 1483
Vidal Baamonde sinalou que “durante estas dúas xornadas miles de persoas achéganse a este concello da Mariña Lucense para coñecer parte do noso patrimonio, paisaxe, e historia, retrocedendo no tempo ata o ano 1483, no que apresaron ao Mariscal Pardo de Cela”.
PROGRAMACIÓN COMPLETA
Venres, 19 de xullo
20.30 Pregón a cargo de Juanma Marrube
21.00 Danzas medievais a cargo de Marco Uría
22.00 Desfile de traxes medievais a cardo de O Nabiño de Mondoñedo
23.00 Música
00.00 Queimada popular a cargo do Bruxo Mon
Sábado, 20 de xullo
11.00 Demostración de cetrería
12.00 Nomeamento, bendición e imposición de medallas aos Escudeiros do Castro no Patio de Armas do Castelo
13.00 Espectáculo de malabares
14.00 Hora de xantar e coller folgos
17.00 Xogos Valecos
18.00 Tiro con arco
19.00 Demostración de cetrería
20.00 Representación teatral
21.00 Música
21.30 Cea medieval
22.30 Espectáculo de lume
23.00 Música
00.00 Queimada popular a cargo do Bruxo Mon