A Xunta de Galicia financiará a posta en marcha de catro obradoiros de emprego que implican a seis concellos da Mariña Lucense e mailo chairego de Muras, para o que destina un orzamento de 1,18 millóns de euros.
O delegado territorial do Executivo autonómico en Lugo, José Manuel Balseiro, informou hoxe da resolución, por parte do Consello da Xunta, da convocatoria de axudas dirixidas a concellos, mancomunidades e entidades públicas dependentes para a posta en marcha destas iniciativas.
Os obradoiros aprobados, que recibirán o financiamento da Consellería de Economía, Emprego e Industria, permitirán segundo expuxo Balseiro a contratación de 94 persoas, entre alumnos-traballadores (un total de 76) e persoal de dirección, administración e monitores (18 contratos).
TRES DELES, CUNHA DURACIÓN DE NOVE MESES
Os beneficiarios recibirán formación que poderán acreditar cun certificado de profesionalidade, ao tempo que terán acceso a un contrato de traballo durante a súa participación na actividade.
Dos catro obradoiros que se porán en marcha na Mariña, tres deles serán duais, cunha duración de nove meses: Os de Ribadeo Alén do Camiño, tamén o de Sendas de Xove, Cervo e Burela VI e, finalmente o Terras do Sor III, que comparten os concellos de O Vicedo, Ourol e Muras.
En Ribadeo Alén do Camiño, as especialidades abordadas serán a confección e publicación de páxinas web e a promoción turística e información ao visitante. Disporá de 20 alumnos, catro docentes e unha subvención de 336.446 euros.
No tocante a Sendas de Xove, Cervo e Burela VI, o alumnado formarase en operacións auxiliares de revestimentos continuos en construción, actividades auxiliares en viveiros, xardíns e centros de xarinaría, en conservación e mellora de montes e en repoboación, corrección hidrolóxica e construción e mantemento de infraestruturas forestais. Participarán deste taller, co idéntica achega económica, 20 alumnos e cinco profesores.
Finalmente, Terras do Sor III formará aos participantes en atención sociosanitaria de persoas a domicilio e traballos de carpintería e moble.
TALLER DE GARANTÍA XUVENIL
Ademais, desenvolverase un taller de garantía xuvenil, en Ribadeo. Trátase de Doc Tic III, dirixido especificamente a mozo e moza menores de 30 anos. Terá unha duración de seis meses e os participantes deben estar inscritos e en situación de beneficiarios no ficheiro do Sistema nacional de garantía xuvenil no ámbito da comunidade autónoma.
Este taller formará a 16 alumnos, coa participación de catro profesores, e contará cunha achega da Xunta de 180.000 euros.
INICIO EN NOVEMBRO
O inicio dos obradoiros duais está previsto para o mes de novembro, segundo anunciou Balseiro. En canto aos taller de garantía xuvenil, xa se atopa na fase de selección de persoal e comezarán “en breve”.