Ventos de máis de 100 quilómetros por hora no litoral da Coruña e na Mariña Lucense azoutaron con forza as provincias coruñesa e lucense, nas que non cesou a choiva en toda a xornada, do mesmo xeito que en Pontevedra, onde as precipitacións alcanzaron os 60 litros por metro cadrado, segundo informa Meteogalicia.

As zonas nas que as rachas de vento foron máis intensas son Punta Candieira, en Cedeira (A Coruña) e Penedo do Galo (Viveiro), con 100,5 quilómetros por hora (qm/h) e 100,1 qm/h, mentres que a provincia de Pontevedra foi con todo a que rexistrou maiores precipitacións, sobre todo en Castrove, en Poio (Pontevedra) e en Rebordelo, en Cotobade.

No tocante ás temperaturas, a estación de Santa Cruz, no Valadouro, rexistrou a cuarta máxima máis alta da xornada en Galicia, con 16,1º.

INUNDACIÓNS E CORTES DE TRÁFICO

No entanto, as inclemencias meteorolóxicas que manteñen á comunidade en alerta, entre elas a alerta laranxa por temporal costeiro na Mariña Lucense, non provocaron ningún incidente destacable, engaden fontes de Urxencias 112, que citan a sucesión dalgúns accidentes de tráfico consistentes en colisións por alcance pero como os que se rexistran calquera día.

En todo caso, as intensas precipitacións provocaron na tarde deste martes inundacións e cortes de tráfico en varios puntos da cidade de Ferrol, confirmaron a Efe fontes policiais, que pediron colaboración cidadá ante a abundancia de incidencias polo mal tempo.

UN FALECIDO NO MAR

Ademais, as condicións meteorolóxicas adversas na mar impediron a Salvamento Marítimo remolcar o pesqueiro Divina do Mar, que embarrancou a pasada madrugada en Porto do Son, onde perdeu a vida un dos seus tripulantes, logo de sufrir un problema no motor e ser arrastrado cara ás rochas.