IniciosociedadeDenuncian que dous dos catro portátiles para administrar fármacos en medicina interna...

Denuncian que dous dos catro portátiles para administrar fármacos en medicina interna están avariados

A CIG reclama a substitución dos equipos, que provocan "atrasos da administración de medicamentos" no Hospital da Mariña

Publicada o

- Advertisement -

CIG Saúde A Mariña denunciou novamente este mércores a falta de material informático “en condicións”, que segundo a central padecen as enfermeiras da unidade de Medicina Interna do Hospital Público da Mariña.

O sindicato expón que estas profesionais traballan co programa informático Silicon para administrar a medicación, rexistrar constantes vitais ou glucemias, entre outras tarefas. “O problema”, expón a central sindical, “radica en que a implantación do devandito software non está acompañado polas necesarias medidas de materiais informáticos en condicións”, neste caso ordenadores portátiles para facilitar o traballo.

A CIG Saúde alerta que das catro computadoras portátiles existentes para prescribir, administrar e rexistrar a medicación, “un dispositivo está estragado dende o Nadal e sen arranxar, e outro dende o pasado martes, 28 de xaneiro”. A Xerencia do Hospital da Mariña deféndese dicindo que “non hai diñeiro” para renovar os computadores, afirma o sindicato.

Unha denuncia pública similar fora formulada a través dos medios de comunicación pola CIG no pasado mes de novembro.

SEN ORDENADORES DE RESERVA

A central sindical argumenta que o programa Silicon permite evitar o papel no proceso de prescrición e administración de fármacos dentro do hospital “pero a súa implantanción ten que ir acompañado de computadoras portátiles en perfecto estado”. Por iso, a central esíxelle ao Sergas a renovación inmediata dos dispositivos, lembrando que o software é “a única ferramenta informática para prescribir, administrar e rexistrar a medicación e outros parámetros“. 

O sindicato nacionalista solicita un banco de ordenadores para solventar estas situacións, algo inexistente xa que non hai ningún portatil de reserva no centro hospitalario, e así ter sempre en reserva ordenadores portátiles.

A CIG advirte que está situación é consencuencia da perda de autonomía e orzamento propio do hospital mariñao froito das políticas do PP. “Lugo recibe os orzamentos e decide sobre o reparto dos mesmos quedando sen capacidade de decisión o Hospital da Mariña”, conclúe.

CONSECUENCIAS ASISTENCIAIS

A unidade de Medicina Interna ten 38 camas, catro profesionais de enfermaría en quenda de mañá, tres en quenda de tarde e dous na quenda de noite.

“A falta de ordenadores portátiles nunha unidade de hospitalización xa de por si con sobrecarga asistencial provoca atrasos na administración de medicamentos, do rexistro de constantes vitais, glucemias e outros parámetros que son rexistrados dixitalmente”, critica o sindicato, “véndose afectados tamén os pacientes ingresados”.

PRECARIEDADE LABORAL E MATERIAL

A este respecto, a CIG lembra que o Servizo Galego de Saúde (Sergas) fixo público non hai moito tempo un investimento para renovar o parque de computadores e impresoras, “mais a realidade é que á precariedade laboral da enfermería no noso hospital, agora témoslle que sumar a obsolescencia informática”, sinalan.

Desde CIG pregúntanse se estes son os máis e mellores servizos e a “alta tecnoloxía” que o Partido Popular anunciou para o Hospital da Mariña e “onde están os cartos prometidos” para a renovación dos equipos informáticos.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...