A Plataforma na Defensa da Sanidade Pública da Mariña criticou este xoves a actitude do Servizo Galego de Saúde (Sergas) pola colocación dun letreiro para revindicar como “hospital público” o centro hospitalario da bisbarra, en Burela.

O colectivo cualifica a iniciativa de “electoralismo“, dado que “os hospitais do Sergas son públicos por definición”. A plataforma sanitaria resaltou ao longo dos últimos anos as contantes derivacións de pacientes a centros hospitalarios privados como parte do que entende como unha estratexia da Xunta de Galicia de “privatización dos servizos sanitarios” e de “desmantelamento da sanidade pública”.

A colocación destes carteis -con letras de 1,60 metros de alto e símbolos de dous metros a cada lado do Sergas e da Xunta- nos principais centros hospitalarios de Galicia é unha constante desde o ano 2017, cando a Xunta investiu 150.000 euros en instalar catro letreiros en centros da provincia da Coruña. No 2019 colocou outros dez por un importe de medio millón. Nesta decena de casos, os prezos oscilaron entre os 48.000 e os 53.000 euros.