O número de casos activos de coronavirus na provincia de Lugo mantense practicamente estable con respecto ao pasado martes, segundo a estatística oficial ofrecida polo Servizo Galego de Saúde (Sergas). A Consellería de Sanidade contabiliza 566 positivos, tres máis có pasado día 7.
No tocante aos datos de hospitalización no Hospital Público da Mariña, producíronse seis altas; son catro casos de coronavirus na Unidade de Coidados Intensivos (Uci) e 12 en plantas de hospitalización, polos 22 rexistrados o pasado martes.
Dos 566 positivos na provincia, 15 fican na Uci -os outros once no HULA– e 55 en hospitalización, dez menos ca onte (doce na Mariña, sete no Hospital Público de Monforte, oito no Virxe dos Ollos Grandes e o resto no HULA). Documentáronse 496 casos en domicilio (13 máis có martes).
278 MORTES EN GALICIA
A nivel autonómico, o número de positivos en Galicia ascende a 5.460; deles 1.138 son da área da Coruña, 566 da de Lugo, 1.001 da de Ourense, 460 da de Pontevedra, 1.066 da área de Vigo, 911 da de Santiago, e 318 da de Ferrol.
Do total de pacientes positivos, 158 permanecen en Uci, 835 están en unidades de hospitalización e 4.467 no domicilio. Polo de agora, en Galicia rexistráronse 800 altas de pacientes e 278 falecementos. O número de PCR realizadas é de 34.423.