A presión asistencial por mor do coronavirus sobre o Hospital Público da Mariña continúa estable. Segundo o Servizo Galego de Saúde (Sergas), hai dous pacientes con positivo na Unidade de Coidados Intensivos (Uci) do centro hospitalario de Burela e outros catro en planta, un dato que non varía por terceiro día consecutivo.
A nivel provincial, o número de casos activos é de 595, un máis có pasado sábado. Deles, oito permanecen en unidades de críticos -os outros seis no Hospital Universitario Lucus Augusti (HULA)- e 32 en planta -os catro da Mariña, doce no Virxe dos Ollos Grandes e o resto no HULA-. Hai 554 positivos en domicilio, un máis.
444 FALECEMENTOS
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 6.205, deles 1.392 son da área da Coruña, 595 da de Lugo, 1.233 da de Ourense, 507 da de Pontevedra, 1.104 da área de Vigo, 1.034 da de Santiago, e 340 da de Ferrol.
Do total de pacientes positivos, 112 permanecen en UCI, 596 están en unidades de hospitalización e 5.497 no domicilio. Polo de agora, en Galicia rexistráronse 1.536 altas de pacientes e 444 falecementos. O número de PCR realizadas é de 63.715.
