O Concello de Foz anunciou que fará temporalmente de sentido único o paseo marítimo da capital municipal entre as praias da Rapadoira e Llas.
Os veciños que vaian da Rapadoira a Llas deberán utilizar necesariamente o paseo marítimo. Pola contra, os usuarios que volvan cara o casco urbano ou paseen desde o segundo dos areais mencionados en dirección ao primeiro, terán que usar necesariamente a beirarrúa da estrada, a máis afastada do mar.
Deste xeito, o goberno local tenta evitar aglomeracións e garantir a distancia interpersoal nun contexto de desescalada.
“Estamos pendentes do comportamento da poboación e sabemos que moita xente aproveita o paseo marítimo. É unha decisión que pode causar molestias, pero dentro das reunións semanais que temos con Garda Civil, Policía Local e Protección Civil púxose enriba da mesa esta idea e pensamos que é a máis axeitada neste momento”, expuxo o alcalde, Fran Cajoto.
NAS BEIRARRÚAS, POLO LADO DEREITO
“Sabemos que somos un pobo eminentemente turístico e por iso, ante a proximidade do verán, debemos extremar ao máximo as medidas de distanciamento social. Recomendamos tamén que a circulación de peóns nas beirarrúas de toda a vila se realice polo lado dereito dado que moitas delas son demasiado estreitas e resulta complicado manter a distancia”.