O Boletín Oficial do Estado (BOE) publicou o pasado luns a inscrición definitiva das variedades galegas de pemento Couto Grande e Piñeira no Rexistro de Variedades Comerciais como variedades de conservación. Así, a partir de agora poderanse producir e comercializar as súas sementes, tras anos de trámites.

Ambas variedades caracterízanse por seren pementos de carne media-grosa, de sección case cadrada e de cor verde escura. No caso do Couto Grande, consómese en verde ou maduro, e na variedade Piñeira adoita consumirse en verde, sendo esta última unha variedade moi adaptada para o cultivo ao aire libre en zonas costeiras. Trátase dunha especie con orixe en Ribadeo, na parroquia do mesmo nome.

Cultívase habitualmente ao aire libre. É un pemento grande, cadrado e co ápice afundido con 3-4 cantos. Ten a pel lisa, de cor verde e a carne grosa. É de sabor doce e consómese en verde, cun peso medio de 160 gramos.

“Esta é unha variedade completamente autóctona que, no seu día, supuxo un peso moi importante na economía dos agricultores da localidade. Ribadeo ten uns produtos hortícolas extraordinarios que ben merecen postos en valor, e o o noso pemento é unha delicatessen e debemos valoralo como tal”, asegurou o voceiro do PP na corporación ribadense, Daniel Vega, nunha nota de prensa na que valorou o recoñecemento.

O Concello de Ribadeo, en colaboración co colectivo A Sucadoira, ten tamén promocionado esta variedade en eventos como a Feira da Horta.