O Colexio de Cervo organiza durante esta semana unha carreira solidaria virtual, ‘Corre por Nós‘, cuxa recadación irá destinada á Cruz Vermella, que está a abastecer de alimento e de bens básicos as persoas máis vulnerables ante a crise socioeconómica que trouxo o coronavirus.
Trátase dunha actividade que normalmente se facía ao aire libre no campo de fútbol de San Cibrao, pero que se modifica este ano por mor da Covid-19. Estudantes do centro educativo cervense protagonizan un vídeo promocional no que animan a todos os veciños a participar na proba, que se prolongará ata o vindeiro domingo, 14 de xuño.
As persoas interesadas en participar poden inscribirse na web rockthesport.com, cunha inscrición de dous euros máis o que se queira engadir a vontade. Deste xeito, os participantes recibirán dorsal e poderán completar o percorrido suxerido -en función da categoría e idade- no lugar e horario que mellor lles conveña. “Está aberta a todo o mundo e somos flexibles nos criterios porque o interesante é a participación”, sinala o director do centro educativo, Manuel Martínez.
