O número de casos activos de coronavirus na provincia repuntou de xeito mínimo despois de 16 días de descenso ou estabilidade. Desde o 24 de maio, cando se documentaban 58 positivos na área lucense, a cantidade de infectados non subía respecto ao reconto oficial do Sergas da xornada anterior. A estatística deste martes documenta 31 contaxiados, polos 30 de onte.
O Hospital Público da Mariña non ten ingresados por Covid-19 e as residencias da bisbarra están tamén libres de coronavirus segundo a información oficial da Consellería de Sanidade. O único hospitalizado na provincia por mor do virus permanece en planta do HULA, e documéntanse 30 casos -un máis- en domicilio.
No histórico da provincia documéntanse 28 falecementos, cinco deles na Mariña, ademais dunha sexta vítima mortal que faleceu na Uci de Burela malia superar o virus durante o seu período na unidade de críticos. Déronse 899 altas.
A área lucense é a única na que repuntan os casos de Covid-19. En Galicia documéntanse 503 casos activos, cun histórico de 618 falecementos e 10.275 altas.
