O Servizo Galego de Saúde (Sergas) confirmou outros catro novos positivos de coronavirus na Mariña Lucense, onde constatou a existencia de dous focos da doenza, en Xove e Burela, aínda que hai infectados en varios municipios da bisbarra. Deste xeito, o número de casos activos na comarca ascende a 22.
Os novos casos son froito dos rastrexos e teñen polo tanto “relación” cos dous núcleos localizados, segundo confirman fontes do Sergas.
A Consellería de Sanidade expón que as probas realizadas a partir de detectarse o primeiro caso de infección por Covid-19 na Mariña, o pasado martes nun núcleo familiar de Xove, “superan as 200. Nestes momentos, aínda hai estudos pendentes de obter o resultado, ao tempo que se seguen a facer máis probas aos contactos xurdidos dos novos casos”, indica.
Dos 22 casos positivos “a maioría son asintomáticos ou presentan síntomas de carácter leve“, e teñen a obriga de gardar corentena durante 14 días. Unha das persoas con resultado positivo -un home residente en Burela, de 71 anos- está ingresada no Hospital Público da Mariña: segue en planta e estable.
Do mesmo xeito, as persoas cuxas probas deron resultado negativo permanecerán en seguimento no seu domicilio, concreta o Sergas.
“A Consellería de Sanidade leva rastrexado ata o momento a máis de 150 persoas relacionadas con este brote e séguense a investigar os contactos que teñen relación cos novos casos que foron aparecendo”, expón.
O departamento sanitario da Xunta de Galicia insistiu en que “avalía” a posibilidade de que os dous focos de Covid-19 activos na comarca de A Mariña, o de Burela e o de Xove, “estean relacionados entre sí“, polo que segue a investigar “todas as relacións entre eles”.
38 INFECTADOS NA PROVINCIA DE LUGO
Con estes tres novos casos, o número de positivos de coronavirus na provincia de Lugo ascende a 38, segundo o Sergas. Destas 38 persoas infectadas, hai outra máis en hospitalización -ademais do varón ingresado en Burela-, que permanece nunha planta do Hospital Universitario Lucus Augusti (HULA).
Non hai infectados segundo o cómputo oficial nas residencias da bisbarra, que foron pechadas ás visitas.
No histórico da provincia desde o inicio da pandemia documéntanse un total de 28 falecementos, cinco deles na Mariña Lucense, ademais dunha sexta vítima mortal que faleceu na Uci de Burela tras ingresar polo virus e superalo durante o seu período na unidade de críticos. Déronse 922 altas.
RECOMENDACIÓNS
A Consellería de Sanidade reitera á cidadanía que empregue o número 061 só para emerxencias ou casos graves e aconsella utilizar o número gratuíto 900 400 116 para consultar dúbidas ou síntomas leves de coronavirus. Así mesmo, o departamento sanitario galego ten a disposición da poboación o teléfono 881 00 20 21 para persoas de fóra da comunidade autónoma que visiten Galicia e desexen consultar dúbidas ou sintomatoloxía relacionada co Covid-19.