EFE. A Asociación Provincial de Autoescolas de Lugo solicitou á Dirección Xeral de Tráfico que se manteñan na comarca da Mariña os exames para poder obter o permiso de conducir, tanto teóricos como prácticos, do mesmo xeito que acontece noutras zonas onde as autoridades sanitarias impuxeron restricións pola aparición de brotes de coronavirus.
A presidenta da asociación, Mónica Pérez, en declaracións á axencia EFE, precisou que, a priori, os exames que ían celebrarse na Mariña o día 8 de xullo están en suspenso.
O CARNÉ É UNHA “FERRAMENTA LABORAL”
Pérez recordou que noutras localidades, como é o caso de Lleida, malia a existencia dunha resolución de confinamento, os examinadores seguen desprazándose para realizar os exames, extremando as medidas para evitar contaxios.
Por iso, a asociación que agrupa ás autoescolas lucenses pide replicar na Mariña ese mesmo sistema e recorda que os desprazamentos por motivos laborais non están prohibidos.
Lembra, así mesmo, que se a situación se prolonga no tempo, pode producirse un tapón nos exames para obter o permiso de conducir na comarca, malia que o propio carné é unha ferramenta laboral.
Baixo o seu punto de vista, esa decisión dificultaría aínda máis a situación dunha comarca que está sufrindo polo peche decretado pola Xunta ante o aumento de positivos de coronavirus.
CANCÉLANSE 88 EXAMES TEÓRICOS E 46 PRÁCTICOS
A Xefatura Provincial de Tráfico informou de que, como consecuencia das medidas de prevención contra a COVID-19 tomadas nos concellos indicados na Orde do 5 de xullo de 2020 da Consellería de Sanidade, foron suspendidos temporalmente desde o 6 de xullo no centro de Foz os exames teóricos e prácticos para a obtención de toda clase de autorizacións administrativas para conducir.
A suspensión afecta ás probas programadas a partir do 8 de xullo no centro desprazado de Foz: un total de 88 exames teóricos, incluíndo exames de recuperación por perda de vixencia da autorización administrativa para conducir e de obtención e renovación da autorización especial para conducir vehículos que transporten mercancías perigosas; 19 probas de aptitudes e comportamentos en circuíto pechado e 46 probas de circulación en vías abertas ao tráfico en xeral.
As citas de exame que non se puideron realizar serán anuladas ata que a situación sanitaria permita o reinicio da actividade no centro desprazado. Unha vez que sexa posible continuar coa actividade, coa antelación suficiente, proporcionarase ás autoescolas as indicacións oportunas para a reanudación das probas suspendidas e a asignación dunhas novas datas de exame.
