A nova situación permitiu que, dez días despois do peche da Mariña por mor do brote de coronavirus, a oficina de turismo de Viveiro atendese visitantes de novo, do mesmo xeito que a de Ribadeo, onde tamén se deixaron ver peregrinos do Camiño de Santiago, segundo fontes do sector hostaleiro.

Ademais, en Foz celebráronse este xoves, diferentes actos con motivo da festividade do Carme, patroa dos mariñeiros, tamén da vila de San Cibrao. A misa foi no pavillón para gardar as distancias. Este ano, do mesmo xeito que noutras localidades costeiras da comarca, onde se celebra esta festividade, non hai festa, pero si ruadas e actuacións musicais, aínda que con aforamento limitado e en cadeiras, como mandan os protocolos.

Co levantamento do peche xa son varios os hoteis que anunciaron a súa “volta”; é o caso de Hotel Val do Naseiro, en Viveiro, e o Hotel Oca, en Foz. Ambos avisaron que volven operar nun caso este mesmo xoves e no outro o venres.

Ao mesmo tempo, algúns dos locais que pecharan polo brote tamén empezan a reabrir; así o fixo o restaurante San Miguel, de Ribadeo, que por prevención e ante un positivo dunha persoa que traballou un día decidira pechar, segundo o propio xerente do negocio.

CHAMADA Á “RESPONSABILIDADE”

Coa nova situación, os municipios levantan limitacións. É o caso do concello de Viveiro, que reabriu esta mañá os parques, pavillóns municipais e baños públicos que con ocasión do rebrote foran clausurados.

A pesar diso,a alcaldesa, María Loureiro, solicitou “responsabilidade” e “concienciación” aos veciños e visitantes, á vez que empraza ao cumprimento das medidas preventivas en vigor.

Xunto a isto, advertiu de que “Protección Civil e Policía Local, coa colaboración dos socorristas do municipio, continuarán controlando os accesos e capacidade das praias co fin de asegurar o respecto da distancia interpersoal de seguridade entre usuarios”. Avisa de que en caso de “aglomeracións ou incumprimentos de distancias” procederase ao “peche dos areais”.

PROMOCIÓN TURÍSTICA PARA RECUPERAR O TECIDO ECONÓMICO

Doutra parte, os concellos da zona, a través da Mancomunidade de municipios, comunicaron, tras unha reunión telemática este mércores pola tarde, que traballan para recuperar a actividade económica nos diferentes municipios tras o parón provocado polo confinamento.

Así, manifestaron que pretenden recuperar a reputación da Mariña como destino turístico. O presidente da mancomunidade, Francisco Cajoto, avanzou que nuns días unha campaña de promoción desta comarca como destino turístico tranquilo.

PLAN DE SUSTENTABILIDADE TURÍSTICA

Noutra orde de cousas, este xoves as Xunta comprometeuse a pór en marcha medidas para reactivar o turismo na Mariña e reforzar a súa imaxe como destino seguro. Así o anunciou o conselleiro de Cultura e Turismo, Román Rodríguez, tras un encontro con respresentanets da Asociación Provincial de Hostaleiros de Lugo. Segundo explicou aos empresarios turísticos, a Xunta proporá ao Goberno de España e aos concellos da comarca que a bisbarra lucense se converta no primeiro territorio galego no que se poña en marcha un Plan de Sustentabilidade Turística, unha iniciativa que o Estado quere implantar en colaboración coas administracións locais e autonómicas en destinos pioneiros xa consolidados e en territorios rurais e do interior.