O número de casos activos relacionados co brote de coronavirus que afecta á Mariña sitúase en 51, cifra igual á de onte, despois de que se documentase unha alta e un caso novo, segundo o reconto comunicado este domingo polo Servizo Galego de Saúde (Sergas).

De acordo coa mesma fonte, realizáronse un total de 185 PCR nesta última xornada.

Dos 51 casos activos, “a maioría son asintomáticos ou presentan síntomas de carácter leve”, afirma a Consellería de Sanidade, e teñen a obriga de gardar corentena durante 14 días.

O número de hospitalizados na bisbarra a causa da pandemia segue baixando. Dúas persoas con covid-19 atópanse ingresadas no Hospital Público da Mariña, polas tres de onte, e a súa evolución é “favorable”.

As persoas cuxas probas deron resultado negativo permanecen en seguimento no seu domicilio. En relación co brote da Mariña hai 338 persoas confinadas, unha máis que onte.