Naceu no ano 1965 en Pouilly sous Charlieu (Francia), pero o apelido de Jorge Casabella non engana: é un mariñao que vive polo ancho mundo. A súa familia procede do lugar de Oiras, en Alfoz. Este verán cumpriu un proxecto que ao que lle levaba dando voltas “máis de 20 anos”. Neste 2020 marcado polo coronavirus cumpriuno: ir en solitario, e en bicicleta, ao encontro das súas orixes galegas.
Casabella está afeito aos retos, indica, e despois de realizar a Maratón de Roma ou Lle Roc d’ Azur, cun percorrido en bici de 88 quilómetros en plena montaña, desta volta superouse para unir o seu lugar de domicilio, Saint Pierre A Noaille, na rexión francesa de Loire, con Cangas de Foz e Burela: máis de 1.400 quilómetros.
Ademais, deulle un sentido solidario á súa aventura ao destinar o recadado á asociación Lles Petits Princes, “xa que o seu obxectivo principal é realizar os soños de nenos e nenas con algún tipo de enfermidade: o seu lema é: é apuntando á lúa que chegamos ás estrelas”, remarca o ciclista, que tras uns días na comarca o sábado volverá “á miña terra de adopción”.
