A Plataforma na Defensa do Ferrocarril Ferrol-Ribadeo emitiu este martes un comunicado de prensa no que realiza un chamamento a colectivos e Administracións a que apoien a reclamación a Renfe de que mellore os horarios tanto no tren de proximidade da cidade departamental a Ortigueira, como na liña que segue ata Asturias pola Mariña Lucense.
Durante o estado de alarma, Renfe recortou as frecuencias na comarca nun 75%, unha situación que non cambiou nin sequera en verán co aumento de poboación nunha comarca de atractivo turístico, e semella que tampouco en setembro, momento no que os estudantes -tanto os dos centros educativos da comarca como os universitarios- volven ás aulas e moitas persoas aos seus postos de traballo tralas vacacións.
A plataforma remarca que Renfe “non estableceu polo de agora unha data de recuperación”, condicionando a restitución dos servizos “ao aumento da demanda”, “esa que precisamente nin quere recoñecer nin ten medios para coñecer”, salientan desde o colectivo.
Ante a “urxente necesidade” de contar con servizo “nos horarios básicos”, e postos que posto nas comarcas da Mariña e Ortegal “non existe alternativa de transporte público“, ao que se suma “o inminente inicio lectivo na Secundaria e Universidade, fannos ver unha vez máis o desmedido interese de Renfe e das administracións responsables, por destruír definitivamente o noso tren“, subliñan os usuarios.
HORARIOS
“Non alcanzamos a entender cal é o motivo de non manter os horarios máis básicos e usados durante todo este tempo, e ver como se mantiveron en todo o estado de alarma ata agora horarios por si mesmos, illadamente, inservibles para a cidadanía”, lamenta a plataforma, que dunha maneira “máis que desesperada, dada a urxente necesidade de transporte da mocidade das nosas comarcas”, solicita a restitución das seguintes frecuencias:
PROXIMIDADES:
-ORTIGUEIRA-FERROL 6:35
-FERROL-ORTIGUEIRA 20:05
MEDIA DISTANCIA:
-RIBADEO-FERROL 6:55
-OVIEDO-FERROL 7:30
-RIBADEO-FERROL 15:00
-FERROL-RIBADEO 10:45
-FERROL-OVIEDO 15:30
-FERROL-RIBADEO 19:05
