O número de casos activos de coronavirus na provincia de Lugo ascende a 450, con 25 máis ca onte, segundo o reconto ofrecido este domingo polo Sergas. Nas últimas 24 horas documentáronse 41 positivos novos e déronse 17 altas, sen que se rexistrasen falecementos de pacientes Covid-19.
Viveiro é o único concello mariñao en alerta, concretamente na amarela -a de menor incidencia do virus-, con doce positivos localizados na última semana. Nas últimas horas non houbo cambios, sen novos infectados nin altas.
Dos 450 contaxiados, 21 permanecen ingresados. Dezanove son atendidos no HULA, entre eles os tres da área sanitaria lucense que requiren coidados intensivos. O Hospital Público da Mariña ten un doente Covid-19 e o centro hospitalario de Monforte outro.
No histórico da provincia documéntanse 92 falecementos, 3.026 altas e 3.568 contaxiados desde o inicio da pandemia.
RESIDENCIAS
No tocante ás residencias da Mariña, localízase un único caso, o dunha traballadora do xeriátrico DomusVi de Viveiro.
MAIORES
79 Residencia DomusVi Lugo (Outeiro de Rei)
TRABALLADORES
2 Residencia Orpea Lugo (Lugo)
2 Residencia O Incio
11 Residencia DomusVi Lugo (Outeiro de Rei)
1 Residencia DomusVi Viveiro
2 Residencia Domusvi Bóveda
1 Residencia San Vicente de Paúl (Lugo)
4.932 CASOS EN GALICIA, 187 MÁIS
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 4.932, deles 839 son da área da Coruña, 450 da de Lugo, 1.577 da de Ourense, 457 da de Pontevedra, 708 da área de Vigo, 719 da de Santiago, e 182 da de Ferrol.
Do total de pacientes positivos, 43 están en UCI, 246 en unidades de hospitalización e 4.643 no domicilio. Polo de agora, en Galicia hai un total de 23.326 persoas curadas, rexistrándose 818 falecementos. O número de PCR realizadas é de 586.482.