O número de casos activos de coronavirus na provincia de Lugo é de 518, 21 máis ca onte, segundo o reconto ofrecido este mércores polo Sergas. Nas últimas 24 horas confirmáronse 40 novos positivos por PCR e 19 altas, sen que se producisen falecementos.
Dos 518 contaxiados, 19 permanecen ingresados. Dezasete -entre eles os tres pacientes da área sanitaria lucense que requiren de coidados intensivos- son atendidos no HULA; o Hospital Público da Mariña coida un paciente Covid-19, ao igual que o centro hospitalario de Monforte.
No histórico da provincia documéntanse 92 falecementos, 3.066 altas e 3.676 casos acumulados desde o inicio da pandemia. Realizáronse 70.070 PCR.
RESIDENCIAS
No tocante ás residencias, localízase un único caso nos xeriátricos da Mariña, o dunha traballadora de Domusvi Viveiro.
CENTROS EDUCATIVOS
Nos centros educativos da comarca non se localizan positivos, nin entre o persoal nin entre o alumnado, segundo o reconto do Sergas.
Non hai concellos da Mariña en alerta 1 por Covid-19, isto é, todos rexistraron seis casos novos ou menos nos últimos sete días. Esta é a situación epidemiolóxica da bisbarra antes de que se apliquen as restriccións de nivel 2, desde as 00.00 horas do xoves.
836 FALECEMENTOS EN GALICIA, CON 5.457 CASOS, 242 MÁIS
A Dirección Xeral de Saúde Pública da Consellería de Sanidade informa que na última actualización, o número de casos activos de coronavirus en Galicia é de 5.457 (242 máis); deles 905 son da área da Coruña, 518 da de Lugo, 1.494 da de Ourense, 538 da de Pontevedra, 900 da área de Vigo, 851 da de Santiago, e 251 da de Ferrol.
Do total de pacientes positivos, 48 están en UCI, 294 en unidades de hospitalización e 5.115 no domicilio. Polo de agora, en Galicia hai un total de 24.012 persoas curadas, rexistrándose 836 falecementos. O número de PCR realizadas é de 602.975.
