O Cupón Fin de Semana da ONCE deixou no municipio de Foz 260.000 euros ao resultar premiados 13 boletos co premio ás cinco cifras, o que supón 20.000 euros cada un.
Segundo informou a ONCE nun comunicado, o vendedor que repartiu a sorte entre os focenses foi Perfecto Parga Sánchez, que vende nun expositor na Avenida da Mariña número 45 de Foz.
Desde primeira hora da mañá deste luns xa o visitaron varios clientes afortunados, destacou a organización, que engade que o diñeiro “está moi repartido entre mulleres e homes, todos compradores habituais durante a semana”.
Parga leva pouco máis dun ano coa venda de produtos de xogo da ONCE e desde o pasado decembro nesta céntrica rúa de Foz. Ten unha discapacidade física por mor dun grave accidente de tráfico cando se dirixía ao seu anterior traballo nunha carpintaría metálica de aluminio e “está moi contento de poder canalizar de novo a súa vida laboral incorporándose á ONCE”, destacou a entidade.