O número de casos activos de coronavirus na provincia de Lugo baixa a 1.102, seis menos ca onte, segundo o reconto ofrecido este mércores polo Servizo Galego de Saúde (Sergas). Nas últimas 24 horas confirmáronse un total de 37 positivos novos.
Dos 1.102 contaxiados, 43 permanecen ingresados, catro menos ca onte. O Hospital Público da Mariña atende oito pacientes con Covid-19, por 28 o HULA -entre eles os oito da área sanitaria lucense que requiren de coidados intensivos- e sete o centro hospitalario de Monforte.
No histórico da provincia documéntanse 118 falecementos –o último, o dunha usuaria da residencia de Guntín-, 4.804 altas e 6.024 casos acumulados desde o inicio da pandemia. Fixéronse 99.387 PCR, o que implica que nas últimas 24 horas efectuáronse 613 probas.
No tocante á situación epidemiolóxica, en Burela detectáronse 38 casos nos últimos 14 días, cunha taxa de incidencia acumulada da Covid-19 igual ou superior aos 250 positivos por 100.000 habitantes. En Viveiro, que igual que o municipio burelao seguirá confinado perimetralmente e coa hostalería pechada, localizáronse nas últimas dúas semanas 16 infeccións, con entre 50 e 150 contaxios por cada 100.000 residentes.
Segundo concretou o responsable da área sanitaria, Ramón Ares, a liberación do municipio de Monforte das restricións de nivel 1, que padecen os dous municipios mariñaos entre outros arredor de 60 concellos galegos, debeuse a que a taxa de incidencia acumulada baixou dos 100 positivos por 100.000 habitantes.
En Foz, o número de casos novos segue en aumento, con 27 nos últimos 14 días, por 15 de Cervo, 10 de Xove e outros tantos de Ribadeo. Con entre un e nove casos novos nese mesmo prazo sitúanse O Valadouro, Alfoz, Mondoñedo, Lourenzá, Barreiros, Trabada e A Pontenova. Ourol, Riotorto e O Vicedo seguen libres de Covid-19.
