Un temporal costeiro de vento e ondada deixará en alerta máxima este domingo ao litoral da Coruña e Lugo, onde se prevé un mar combinado de oeste que deixará ondas de entre 8 e 10 metros a partir da noite do domingo.
Con todo, segundo a previsión de Meteogalicia, a situación no mar motivará que xa desde primeira hora da mañá estean activos avisos en toda a costa de Galicia. Deste xeito, A Mariña estará en aviso laranxa por ventos de oeste de forza 8 con intervalos de 9 a partir das 06,00 horas do domingo.
O aviso elevarase ao máximo nivel (identificado a cor vermello) a partir das 21,00 horas e manterase, polo menos, ata a noite do luns. Ademais da ondada tamén se agardan fortes ventos na Mariña con refachos de máis de 100 quilómetros hora, así como ventos de forza oito con intervalos de 9 a partir da mañá do domingo.
AVISO NO INTERIOR
Ademais, o temporal tamén se deixará notar en zonas do interior, o que levou ás autoridades a decretar o aviso amarelo por ventos en case toda a provincia da Coruña e Lugo ao longo das horas centrais do día.
Un aviso que será laranxa na montaña de Lugo e Ourense, onde tamén se agardan refachos de vento de ata 100 quilómetros por horas nun domingo que dará paso a un luns que deixará nevadas nestas zonas.