- Advertisement -
Malia que a normativa definitiva será publicada nas próximas horas no Diario Oficial de Galicia (DOG), a Xunta anunciou algunhas das medidas que decretará a partir das 00.00 horas do vindeiro mércores, 27 de xaneiro, para conter o coronavirus, cunha vixencia mínima de “tres semanas”. Segundo expuxo o presidente do Goberno autonómico, Alberto Núñez Feijóo, as medidas serán as seguintes.
AS REUNIÓNS, SÓ DE CONVIVENTES
As interaccións sociais estarán limitadas a conviventes, agás nas actividades xustificadas. Así mesmo, a mobilidade reducirase ao propio concello, agás para ir ao traballo, a un centro sanitario ou a un docente. O toque de queda mantense nas 22.00 horas.
As actividades esenciais permitidas (con condicionantes) son a sanidade, a educación, o coidado a menores ou maiores, o traballo e o comercio. Seguen interrompidas as visitas aos enfermos nos hospitais, agás nos casos en que o precisen por razóns de dependencia ou coidados.
As universidades non reanudarán as clases ata o día 8 de febreiro e de 8 a 17 de febreiro serán en liña. Por agora, a nivel educativo non trascenderon outras medidas, como o peche das escolas infantís, colexios e institutos.
SUPERMERCADOS, FARMACIAS E TALLERES, COMERCIO “ESENCIAL”
No tocante ao comercio, establécense dous horarios.
Que entende a Xunta por comercio esencial? Supermercados, farmacias ou talleres de vehículos. Pecharán como moi tarde ás 21.30 horas.
O restante comercio, considerado non esencial, permanecerá aberto ata as 18.00 horas, e os centros comerciais só deberán pechar a fin de semana.
A HOSTALERÍA, SÓ PARA RECOLLER OU ENTREGAR A DOMICILIO
A hostalería pechará sen poder utilizar o servizo de terraza, agás recollida, servizo a domicilio e comedores laborais.
SEN PÚBLICO NAS COMPETICIÓNS ESTATAIS
O deporte ficará restrinxido a práctica individual ao aire libre, no propio concello e con máscara, co peche dos ximnasios. Cancélanse as competicións deportivas autonómicas e os adestramentos destes equipos -unicamente poderán continuar as estatais e internacionais- e elimínase o aforamento nas competicións nas que estaba permitido. Deste xeito, os encontros do Pescados Rubén Burela FS e FSF serán sen público.
SUSPENSIÓN DOS EVENTOS SOCIAIS E CULTURAIS
Suspéndese a actividade en calquera establecemento cultural ou de espectáculos; péchanse museos, bibliotecas e teatros. Tamén permanecerán pechados os clubs de xubilados, os centros de día e os fogares de maiores.
