O Concello de Ribadeo anunciou a través dun comunicado que repartirá de xeito gratuíto a partires do vindeiro luns, 8 de marzo, 500 botes de produto desinfectante entre os propietarios de cans do municipio. O obxectivo é concienciar aos donos dos animais da obriga de limpar os ouriños das mascotas, algo que recolle a nova ordenanza de medio ambiente.
O edil desta área, Jorge Díaz Freije, lembrou que “estamos traballando nunha nova ordenanza medioambiental e unha das partes que estamos vendo que preocupa bastante aos veciños e veciñas de Ribadeo é o tema dos animais, neste caso dos cans”.
Díaz Freije subliñou que “dentro desa ordenanza levamos unha modificación nova, que ademais de estar obrigados os donos a recoller os excrementos tamén se inclúen os ouriñes. Hai que levar xunto coa bolsa un frasco con auga con xabón ou con produto desinfectante para que cando ouriñe o can nunha zona pública se bote ese líquido para que estea todo moito o máis limpo posible e sen cheiros”, expuxo o edil.
O concelleiro de medio ambiente ribadense explicou que “no Concello de Ribadeo poñemos en marcha unha iniciativa, compramos uns 500 botes que levan unha solución limpadora que estarán a disposición dos veciños que teñan que sacar a súa mascota á rúa”.
O alcalde ribadense, Fernando Suárez Barcia, concreta que nos botes que vai repartir o Concello pódese ler o lema desta campaña de concienciación: “O can é teu, as rúas e parques de todos. Non deixes pegada. Por un Ribadeo limpo”.
PODERANSE RETIRAR DESDE O LUNS
Estas unidades, gratuítas, poden retirarse en horario de 9.00 a 14.00 horas na área de medio ambiente, desde o vindeiro luns. “Vanse recoller os datos persoais para que non haxa ningunha picaresca. Esta iniciativa está pensada polo ben común, para que estea moito máis limpa a vila e teñamos un Ribadeo máis limpo”, conclúe o Concello.
